A ordenanza para as praias de Vilagarcía prevé multas de ata 3.000 euros
Por Oskar Viéitez
O goberno municipal de Vilagarcía elaborou unha ordenanza de uso, seguridade e conservación das praias que tratará de aprobar no pleno do próximo mes de febreiro. O borrador foi remitido este martes aos grupos da oposición para abrir un tempo de debate.
O regulamento considera as normas a seguir nas zonas de recreo, a prohibición de levar animais ao areal na época de baño ou de tirar cabichas e cascas de pipas á area, inclúe tamén as medidas de hixiene e de convivencia que debe ter en conta todo usuario.
Segundo dixo a voceira do goberno local, Rocío Llovo, en total son 26 artigos referidos ás actividades deportivas ou lúdicas que nas praias se desenvolvan, o uso de embarcacións nas zonas de baño ou aspectos relativos á seguridade, entre outros.
Como infraccións graves contémplase a práctica de xogos ou deportes que supoñan un risco para a seguridade das persoas, non respectar a prohibición de bañarse ou cociñar na praia, entre outras. Entre as moi graves fálase de verteduras contaminantes, navegación de embarcacións non autorizadas ou colocar sen autorización carteis, valos, publicidade ou propaganda no mobiliario urbano.
O incumprimento destas normas sancionarase con multas que oscilarán entre os 60 e os 3.000 euros.