O Concello propoñerá aos seus traballadores un plan para facer exercicio e deixar de fumar
Por Redacción
A Consellería de Sanidade concedeu 60.400 euros de axuda ao Plan de prevención de condutas aditivas que o Concello ten en marcha cunha achega de 30.300 euros e o obxectivo de realizar actividades que reduzan o consumo de substancias como o alcohol, o tabaco, o cannabis ou a cocaína.
Ata o 31 de marzo vanse desenvolver diferentes programas no ámbito escolar. Para alumnos de 1º de primaria ata 3º da ESO haberá obradoiros como o que se vén desenvolvendo de 'Contos para conversar' coa participación, cada curso, de 1.500 alumnos e 60 docentes de 22 centros escolares. Ademais, realizarase un programa de Educación en Valores a través do cine e obradoiros de educación para a saúde en 6º de primaria. Os alumnos da ESO terán obradoiros sobre prevención do consumo de alcohol, de cannabis e doutras drogas ilícitas como a cocaína.
O programa considera tamén actuacións no ámbito familiar, comunitario con talleres que traten a incidencia dos problemas de drogas nas mulleres e tamén intervencións no ámbito laboral. Neste apartado destaca, entre outras, a proposta que se vai desenvolver no concello de Pontevedra cun plan para que os funcionarios deixen de fumar e para que eviten a vida sedentaria realizando exercicio.
Neste sentido, a concelleira de Benestar Social, Carmen Fouces, durante a presentación das actividades sinalou que fomentarán o uso das escaleiras no edificio consistorial. Ao mesmo tempo, a campaña tamén se desenvolverá en empresas do sector alimentario e do de transporte.
DESCENSO DE CONSUMO
Segundo sinalaba a técnica da concellería de Benestar Social, Patricia González, detectouse un descenso de consumo en todas as substancias aditivas nas enquisas que se realizan cando se desenvolven os obradoiros destes programas. Non obstante, as mulleres equipáranse aos homes en consumo diario de tabaco e alcohol, aínda que os homes son os que presentan un índice maior en consumos abusivos. O descenso xeral dos índices relaciónanse, segundo Patricia González, con estas actividades de prevención e tamén coa crise económica.