O PP propón crear un miradoiro na parcela do antigo colexio público de Marcón
Por Redacción
O grupo municipal do Partido Popular propón a recuperación e a rehabilitación da zona de Pazos en Marcón para crear un miradoiro no espazo que ocupa o antigo colexio público da parroquia. O edificio encóntrase nunha parcela municipal cunha extensión de máis de 5.000 metros cadrados.
En 1994 deixou de utilizarse como colexio e pasou a empregarse para actividades veciñais da asociación de pais de alumnos e da Comunidade de Montes. Non obstante, coa construción da Casa da Cultura de Marcón, este edificio deixou de ter uso e encóntrase en ruínas.
Agora, o Partido Popular reclama que se recupere e se rehabilite a zona creando o miradoiro cun espazo verde dende onde se podería ver a ría. Para iso, a concelleira popular Rosa Picallo sinalou que é necesario derrubar o edificio do colexio e o de preescolar situado ao lado e despois desenvolver unha mellora do ámbito.
Neste sentido, propón que o Concello chegue a un acordo coa Comunidade de Montes para que poida cederlles cinco parcelas de máis de 21.000 m2 que permitan construír o Miradoiro de Pazos.
O presuposto que manexa o Partido Popular para esta actuación contempla un custo estimado de 70.000 polo derrubamento dos edificios. Mentres que a recuperación paisaxística e a dotación de mobiliario supoñería outros 50.000 euros. En total, o proxecto supoñería un investimento de 150.000 euros que, segundo manifestou Rosa Picallo, "é unha obra baratiña".
A concelleira reuniuse xa co Alcalde e con representantes da Comunidade de Montes para explicarlles o proxecto.