Volverán as borrascas ás Rías Baixas a partir da noite do martes
Por Redacción
As choivas estableceranse nas Rías Baixas ao longo desta semana, segundo a predición do servizo de Meteogalicia.
Este luns 5 de xuño, as altas presións continuarán estacionarias ao norte das Illas Británicas, con aire frío en altura e cálido en superficie, con inestabilidade atmosférica. Os ceos alternarán entre nubes e claro durante a mañá e haberá chuvascos tormentosos no interior pola tarde. Nas Rías Baixas as temperaturas manteranse entre 14 e 23 graos. O vento soprará de compoñente norte, frouxo, con intervalos moderados no extremo norte.
Durante o martes 6 manterase a inestabilidade atmosférica. Espérase unha mañá con nubes altas, crecendo as nubes de evolución pola tarde, que darán lugar a chuvascos tormentosos durante a noite. As temperaturas moveranse eentre os 15 e os 27 graos con vento de compoñente este, frouxo en xeral.
A influencia dun centro de baixas presións situado no Atlántico afectará á provincia de Pontevedra e a toda a comunidade durante o mércores 7. Espéranse ceos nubrados con precipitacións, máis ocasionais pola tarde. As temperaturas situaranse entre os 16 e os 24 graos con vento de compoñente este, frouxo en xeral, que cambiará a compoñente sur ao final do día.
Galicia quedará baixo os efectos dunha borrasca situada ao oeste de Portugal durante o xoves 8 de xuño. O ceo permanecerá parcialmente nubrado e rexistraranse precipitacións na maior parte de Galicia, localmente fortes e acompañadas de tormenta. As temperaturas seguirán entre 14 e 24 graos con vento de dirección variable.
As temperaturas descenderán lixeiramente a medida que chegue a fin de semana cun descenso da probabilidade de precipitacións.