O vindeiro venres 2 de xuño, ás 19.30 horas, a Unidade de Música da Escola Naval Militar e a Banda de Guerra da Brilat ofrecerán un concerto no Auditorio Sede Afundación. A entrada será libre ata completar a capacidade da sala e ambas as formacións interpretarán un amplo repertorio de bandas sonoras de películas e cancións militares tradicionais.

Será a primeira actividade prevista con motivo da celebración do Día das Forzas Armadas 2023, que se conmemora o 3 de xuño; e do 57 aniversario da creación da Brigada Galicia VII (Brilat) o mércores 7 de xuño. Desta forma, ao longo do próximo mes ata o 29 de xuño desenvolveranse diversas actividades na cidade para ofrecer un maior coñecemento á poboación das actividades e funcionamento da Brilat.

O domingo 4 de xuño inaugúrase unha exposición estática na Alameda de Pontevedra na que se mostrarán as capacidades da Brilat coa presenza de diferentes materiais. O acto iniciarase cun acto de Izado e Homenaxe á Bandeira Nacional, a partir das 12.00 horas nas inmediacións do monumento que rende homenaxe aos heroes de Ponte Sampaio. Finalizará a mostra ás 20.00 horas co acto de Arriado da Bandeira.

O mércores 7 de xuño realizarase o acto central do 57 aniversario da Brilat cunha parada militar na Base Xeneral Morillo, coa presenza de autoridades civís e militares. Conmemórase así a data do 7 de xuño de 1969 no Aeródromo de Rozas, en Lugo, cando se realizou a primeira operación aerotransportada desta brigada no marco do exercicio aeroterrestre AZOR.

Entre o 28 e o 29 de xuño celébrase o Concurso de patrullas entre as localidades de Tui e Santiago de Compostela seguindo o Camiño Portugués ao longo de 120 quilómetros. Confirmaron asistencia patrullas de diferentes unidades de Forzas Armadas españolas e de exércitos de Reino Unido, Portugal e Francia. Por primeira vez realizarase unha proba piloto coa participación de persoas civís.

Ao longo do mes, ao redor de 800 militares de diferentes unidades da Brigada tamén se desprazarán ao campo de manobras de San Gregorio de Zaragoza para participar nunhas manobras preparatorias das unidades asignadas á estrutura de forzas militares Nato Readiness Initiative (NRI) da OTAN.