Polémica na Illa de Arousa: o candidato do PP foi condenado por maltratar unha ex parella
Por Redacción
O candidato do PP á Alcaldía da Illa de Arousa, Matías González, foi condenado en 2011 por maltratar unha ex parella.
O Xulgado do Penal número 4 de Pontevedra condenoulle a 25 días de traballos en favor da comunidade, impúxolle unha orde de afastamento da vítima durante nove meses e privóuselle do dereito de posuír ou portar armas durante ese mesmo período.
Ademais, González tivo que indemnizar á vítima con 90 euros, ao que se sumaron as costas do proceso e o custo da reparación da fractura que a muller sufriu na súa dentadura.
A sentenza do tribunal, á que tivo acceso PontevedraViva, considera probado que na madrugada do 6 de febreiro de 2011, o mozo e a vítima, coa que mantivera unha relación que se rompeu meses antes, atopáronse nunha rúa do municipio.
Ambos empezaron a discutir e, "nun momento dato", o agora candidato do PP golpeou na cara á súa ex parella.
No xuízo, a vítima relatou que o acusado quería acompañala á súa casa e, ante a súa negativa, "comezamos a discutir e agarroume polo brazo", tras o cal "deume dúas puñadas" no pómulo e no beizo, segundo recolle a resolución xudicial.
Varias testemuñas corroboraron esta versión e, aínda que non viron a agresión, aseguraron que se atoparon coa muller no chan, despois de escoitar berros, e co beizo inchado.
O xuíz destaca ademais na sentenza o informe médico da vítima, que subliña que esta sufría "lesións compatibles" coa agresión referida.
O tribunal cualificou os feitos como un delito de malos tratos, aínda que aplicou unha redución na pena atendendo a que a relación de parella cesara e que os feitos non constituíron unha agresión grave, incluíndo ademas "agresións mutuas".
O PP ESIXIULLE RENUNCIAR Á SÚA CANDIDATURA E ESTE NEGOUSE
Desde o Partido Popular aseguran que, ata o día de hoxe, descoñecía a situación xudicial do seu candidato ao non existir un rexistro público de condenas e non ser posible, por tanto, comprobar os antecedentes de cada candidato "á marxe do que eles mesmos declaren".
Tras explicar que Matías González "non é afiliado" e non se lle poden aplicar os estatutos do partido, o PP subliña que unha persoa condenada por estes feitos "non pode representar os valores deste partido", unha formación que "detesta e repudia a violencia de xénero".
O partido esixiu ao seu candidato na Illa de Arousa que renuncie ao seu posto como candidato do PP "por ter unha condena por uns feitos que chocan frontalmente cos principios do Partido Popular e co seu código ético", pero este negouse.
A súa renuncia á candidatura, lamenta o PP, é unha decisión "estritamente persoal" porque unha vez publicadas as listas electorais, só se pode perder a condición de candidato por vontade propia do interesado, polo que o partido "non pode tomar unilateralmente esta decisión".
Ante esta situación, os populares comprométense a que esta persoa "non pasará a integrar o grupo municipal do Partido Popular na Illa de Arousa" tras as eleccións.