A horta urbana Leste dá os seus primeiros froitos
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Hai tres meses poñíase en marcha a denominada Horta do Leste, ante o local social da asociación veciñal Manuel Quiroga-Pedra do Lagarto, fronte ao Colexio Sagrado Corazón. Con esta horta urbana preténdese achegar aos cidadáns os ciclos dos vexetais comúns, a produción de alimentos e plantas ornamentais dunha forma sa e ecolóxica, ao mesmo tempo que se mellora o aspecto ambiental e paisaxístico da cidade.
E os veciños foron durante estes meses familiarizándose cos cultivos na súa contorna máis próxima. Despois da plantación e mantemento da horta, apoiada con cursos de elaboración de marmeladas caseiras e de plantacións en balcóns durante este venres 10 recolléronse os produtos obtidos.
A actividade acompañouse dunha laconada popular e o regalo dunha pequena bolsa con plantas aromáticas que formaban parte da horta coa idea de fomentar a confraternización entre os veciños da zona. A proposta é unha iniciativa da Asociación de Veciños Pedra do Lagarto-Manuel Quiroga en colaboración coa concellería de Cultura e Zonas Verdes.
Xornada de colleita na Horta do Leste
A Asociación de Veciños Pedra do Lagarto-Manuel Quiroga en colaboración coa concellería de Zonas Verdes celebraron a recollida na denominada Horta Leste cunha laconada popular e o agasallo dunha pequena bolsa con plantas aromáticas
© Mónica Patxot