A veciñanza da rúa Serra coñece os detalles dun novo parque para a zona, con áreas de descanso e xogos infantís
Por Redacción
A zona verde situada entre as vivendas da rúa Serra acollerá un novo parque dotado de áreas de descanso e de xogos infantís e a poboación do barrio puido coñecer este martes todos os detalles do proxecto.
O concelleiro de Desenvolvemento Sostible, Iván Puentes, e xefe do Servizo de Parques e Xardíns, Manuel Fontán, presentaron o proxecto nunha reunión celebrada no mercado de abastos.
A actuación suporá un investimento duns 100.000 euros e incluirá a dotación dunha zona de estancia e descanso con bancos e árbores de pequeno porte para sombra; un espazo de xogos infantís de estimulación e desenvolvemento da psicomotricidade; unha segunda zona de estancia e xogo libre pavimentada, e unha área axardinada presidida por uns macizos de plantas vivaces, así como a instalación de mobiliario accesible, papeleiras e puntos de recarga
Puentes explicou que entre os obxectivos desta actuación inclúense a xeración dun espazo saudable para pequenos paseos das persoas maiores e xogos para os cativos.
Para o seu deseño, incorporáronse criterios de adaptación ao cambio climático, renaturalización e resiliencia e tamén se apostará pola mellora da circulación natural da auga da choiva e do sistema de recollida.
A zona na que se levará a cabo esta actuación foi o resultado das iniciativas de creación de vivenda social do Estado a mediados do século pasado e os espazos libres entre as edificacións nunca se rematou, de maneira que este proxecto responde a unha demanda histórica dos residentes nestes edificios.
As vivendas foron feitas no seu día polo Ministerio da Vivenda e, cando se transferiron as competencias á Xunta, a zona verde nunca se transferiu ao Concello, senón que seguiu a ser propiedade da Administración autonómica (salvo unha parte, propiedade das comunidades de propietarios).
Hai un ano o Concello mantivo unha xuntanza coa Consellería de Vivenda da Xunta para estudar a súa vontade de cesión, como paso previo a poder actuar, e Iván Puentes sinala que a colaboración da Xunta foi total neste sentido e pasou unha proposta de cesión que está nestes momentos en fase de estudo por parte da Concellería de Patrimonio e da Asesoría Xurídica do Concello.
En paralelo, a Concellería de Desenvolvemento Sostible elaborou o proxecto de axardinamento que se presentou aos veciños.
O trámite de aceptación da cesión deste espazo por parte da Concellería de Patrimonio "non debería ser demasiado longo".