Carlos Viéitez presenta ao equipo co que aspira á reelección como alcalde de Meaño
Por Oskar Viéitez
A formación política Veciños de Meaño presentou a súa candidatura nun acto moi concorrido no que o aspirante á reelección como alcalde, Carlos Viéitez mostrou en imaxes "a transformación de Meaño nestes catro anos" e pediu a confianza de toda a veciñanza para "continuar co traballo iniciado e rematar algúns dos proxectos en marcha".
O candidato de Veciños de Meaño tirou de localismo para apelar á unión e á unidade do pobo, para sentir "orgullo por ser de Meaño" e para "evitar que nos veña gobernar alguén de fóra de Meaño".
"Teño a honra de presentarme hoxe aquí cun equipo de persoas válidas e capaces e sobre todo con moita ilusión e ideas, proxectos para que Meaño medre en competitividade e en calidade dos servizos", apuntou Carlos Viéitez.
"O noso obxectivo o 28 de maio ten que ser unha maioría absoluta solvente, que nos permita gobernar con tranquilidade e desenvolver o noso programa sen cortapisas nin ameazas externas", dixo. "Eu non quero unha maioría absoluta para min, quéroa para o pobo de Meaño, que merece un goberno estable para apoiar ao sector vitivinícola, ao comercio local, desenvolver o turismo e facer tantas e tantas cousas que quedan por facer".
A candidatura de Veciños de Meaño está composta por Carlos Viéitez (1), Mercedes Cousido (2), Raquel Balboa (3), Jorge Besada (4), María Belén Mosteiro (5), Ramón Alfonso (6), Sheila Feteira (7), Ramón Tilve (8), Ramiro Pazos (9), María Victoria Sineiro (10), María Estévez (11), Ángel Currás (12), María Dolores Balboa (13), Susana Otero (14), Jorge Pazos (15), Paula Caneda (16), José Manuel Arosa (17), Juan Portela (18), María Esther Gómez (19), Lucía García (20), Milagros Pérez (21), Luis Manuel Caneda (22) e Ismael Lorenzo (23).