O Inega concede unha axuda de case 60.000 euros para a instalación de paneis fotovoltaicos no Pazo da Cultura
Por Oskar Viéitez
A portavoz do Goberno municipal de Pontevedra, Anabel Gulías, compareceu en rolda de prensa este martes co obxectivo de dar conta da Xunta de Goberno Local. Alén dos asuntos incluídos na orde do día, a edil informou da concesión desde o Inega (Instituto Enerxético de Galicia) dunha axuda de 59.018 euros para a instalación de paneis fotovoltaicos na cuberta do Pazo da Cultura.
"Unha das apostas deste Goberno foi a dun cambio na subministración eléctrica nos equipamentos municipais", polo que presentáronse solicitudes de axudas ao Programa de Impulso a la Rehabilitación de los Edificios Públicos para las Entidades Locales (PIREP local), por exemplo, para acometer melloras xerais neste sentido en instalacións coma o Pavillón municipal dos deportes, o Pazo da Cultura ou o Recinto Feiral, entre outros.
Gulías engadiu a estas explicacións que "tamén apostamos, de xeito paralelo, pola liña de convocatorias que tiña o Inega, xa que nos permitirá avanzar na transformación dos equipamentos municipais e convertelos en equipamentos eficaces e eficientes desde o punto de vista enerxético".
Coa instalación destas placas solares o Concello aforrará custes de subministración eléctrica "e melloraremos a calidade e eficacia dos equipamentos municipais".
Serán instaladas 186 placas na cuberta do Pazo da Cultura, "algo que permitirá un ensaio interesante de autoabastecemento e de consumos asociados" como forcener tamén dende o Pazo o alumeado eléctrico da zona da xunqueira ou o Recinto Feiral.
O proxecto terá un custo orzamentado en 199.684 euros, dos que o Concello achegaría 140.666 euros. O Concello tamén ten solicitadas axudas para a mellora enerxética en Michelena 30 e nos centros sociais situados no rural.