Prisión por tentativa de homicidio para o presunto agresor da súa exparella en Monte Porreiro
Por Redacción
A maxistrada do Xulgado de Instrución número 1 de Pontevedra, en funcións de garda, decretou nas últimas horas a prisión provisional, comunicada e sen fianza, do detido na noite do sábado en Monte Porreiro por atacar e causarlle un corte no pescozo a súa exparella na rúa Cambria, no barrio de Monte Porreiro.
O presunto agresor está investigado como autor dun delito de intento de homicidio, segundo indican fontes do Tribunal Superior de Xustiza de Galicia e da Policía Nacional.
O home, de orixe colombiana e de cincuenta anos de idade, ingresará en prisión tras protagonizar un intento de apuñalamento á muller de 36 anos que fora a súa parella e coa que convivía na actualidade aínda que xa non mantivesen a relación sentimental.
A muller fora trasladada ao Hospital Montecelo, consciente, para ser atendida polo corte sufrido na garganta cun obxecto punzante.
Inicialmente o home escapara da rúa onde se produciu a agresión, pero terminou entregándose, minutos máis tarde, de maneira voluntaria aos axentes da Policía Nacional.