Identificados cinco mozos por pegar a outro que tocara e dera unha labazada a unha amiga
Por Natalia Puga
Axentes das policías Local e Nacional de Pontevedra interviñeron na pasada madrugada nun incidente con polo menos seis mozos implicados rexistrado na rúa Serra, nas inmediacións da praza de abastos.
Ocorreu sobre as seis e media da madrugada deste xoves a este venres e, como resultado, un mozo resultou ferido con distinto tipo de rabuños e foi trasladado ao Hospital Montecelo.
Segundo informaron fontes policiais, a orixe de todo foi un incidente previo no que un mozo supostamente tocoulle o cu e deulle unha labazada a unha moza.
Os amigos desta moza, e ela mesma, reaccionaron, foron tras este mozo e, na rúa Serra, pegáronlle e quitáronlle a roupa.
Nesta suposta agresión, víronse implicadas seis persoas, e todas elas foron identificadas pola Policía Nacional. Unha delas é o mozo que nun primeiro momento supostamente realizou os tocamentos e a labazada á moza, pero que neste caso figura como vítima. El foi o mozo que tivo que ser trasladado ao hospital con esas lesións leves.
Os outros cinco identificados son os supostos agresores e entre eles tamén está a moza que fora vítima dos tocamentos e da labazada.
Os implicados son mozos pontevedreses de entre 18 e 24 anos, sendo o mozo ferido o maior deles, de 24.