A economía social dos coidados, unha oportunidade de emprendemento que mira a Pontevedra
Por Natalia Puga
"A economía dos coidados é un sector que ten marxe para desenvolverse en Galicia con ideas novas". Así o asegurou este venres en Pontevedra a conselleira de Promoción do Emprego e Igualdade, María Jesús Lorenzana e, como exemplo de boas prácticas do camiño a seguir, mirou cara á cidade do Lérez.
A conselleira puxo a mirada no centro Saraiva Senior da rúa Don Gonzalo, que visitou acompañada pola directora, Cristina Bouzada, e por representantes do Foro da Economía Social de Galicia e de Espazo Coop, a asociación de cooperativas de traballo asociado.
A economía social a través das cooperativas, sociedades laborais e os centros especiais de emprego supoñen un xeito distinto de desenvolver proxectos empresariais, máis apegados nun conxunto de valores máis próximos a fins sociais, tendo demostrado un excelente comportamento en canto a resultados e sustentabilidade.
Lorenzana sinalou este venres que este centro pontevedrés "é innovador en canto ao tratamento e atención das persoas maiores" e por iso quixo visitalo cos responsables das asociacións economía de social, "porque vemos que pode ser unha vía para que se constitúa unha economía social dos coidados".
Así, usando "un modelo que agora mesmo está implantado nesta residencia", ven que "probablemente poida dar lugar a un emprendemento a través do cooperativismo". Así, sinalou que "cremos que este pode ser o modelo que se podería exportar á economía social".
Cristina Bouzada explicou que Saraiva Senior é un centro multiservizos para persoas maiores, que inclúe unidade de memoria e de vida activa e presta servizos de centro de día e de residencia. En total, cada mes presta servizo a unhas 125 persoas, con 28 prazas de centro de día, 39 de residencia e o resto, en función da demanda.
A principal característica deste centro é "nuestra metodología, que es un modelo de atención centrado en las personas, siempre en base a sus gustos y preferencias".
Ademais, impulsa o modelo housing, "que las personas estén como en casa", con espazos abertos, que as familias entren, que as visitas pasen, que as persoas estean en distintas unidades de convivencia facendo o que máis lle apeteza, con lugares para descanso, para actividades e para compartir en familia.