Nova semana de recollida de aparellos eléctricos e electrónicos no campus
Por Redacción
Desde o luns 24 ao venres 28 de abril, as diferentes facultades e escolas do campus, a sede da Vicerreitoría na Casa das Campás e o Pavillón Universitario presentarán un punto de recollida onde as persoas que forman parte da comunidade universitaria terán a oportunidade de depositar computadores; teléfonos móbiles; electrodomésticos e outro tipo de aparellos do fogar que funcionan con baterías ou con pilas.
Esta iniciativa chega xa á décimo sexta edición coa intención de alertar do carácter contaminante dalgúns dos compoñentes dos aparellos eléctricos e electrónicos, co problema que conleva deixalos nun contedor.
A campaña busca concienciar para que se entreguen a un xestor autorizado no tratamento destes residuos.
Na anterior edición, realizada no mes de novembro de 2022, recolléronse preto de 1.600 quilos destes residuos, entre os que se atopaban 83 equipos informáticos e 51 televisores e monitores.
Desde a Vicerreitoría do campus lembran que non se poden depositar nin lámpadas nin baterías e todo o material recollido é trasladado a un xestor autorizado para a súa reciclaxe.