Un menor, condenado a seguir un taller contra a violencia de xénero por maltratar á súa ex noiva
Por Natalia Puga
Un menor pontevedrés foi condenado como autor dun delito de malos tratos de xénero por agredir á súa ex noiva, unha moza coa que mantivo unha relación de dous anos e á que agrediu en plena rúa.
O mesmo día que agrediu á súa antiga parella tamén cometeu outros tres delitos: dous leves de lesións a dous homes que presenciaron a discusión previa co seu ex e un de atentado por agredir un axente da Policía Nacional que acudiu ao lugar dos feitos.
O Xulgado de Menores número 1 de Pontevedra primeiro e a sección cuarta da Audiencia Provincial despois condenárono a 10 meses de liberdade vixiada con obrigación de asistir ao centro no que se atopa matriculado e de realizar un taller de prevención de violencia de xénero.
O menor condenado presentou un recurso de apelación contra a sentenza inicial, pero a Audiencia Provincial confirmou o fallo inicial.
Os feitos ocorreron sobre as 17.00 horas do 30 de xullo de 2021, despois de que a vítima mantivese unha discusión coa curmá do seu ex noivo en presenza del. Tras a pelexa, a moza meteuse nun portal, apoiouse no escaparate e púxose a observar o móbil.
Instantes despois, o agora condenado viuna e achegouse a ela, falándolle dunha forma alterada, e, "con ánimo de menoscabar a súa integridade física", comezou a darlle empuxóns, ata lograr que ela saíse do portal do establecemento.
Posteriormente, xa na rúa, ao ver que se formou un grupo de xente na rúa, colleu unha bicicleta que se atopaba apoiada no muro e lanzouna contra as persoas que estaban a lle pedir que acougase. Alcanzou a dous homes que estaban na zona. Un deles tentou desviala para que non impactase nalgunha desas persoas.
Ata o lugar foron axentes da Policía Nacional e pedíronlle que se identificase. O menor negouse e "con evidente ánimo de menoscabar o principio de autoridade", encarouse cun dos axentes, puxo a súa cara contra a cara do policía, encerellouse con el e tirouno ao chan.