Canelas acollerá a primeira "gran quedada" de autocaravanas e campers "con peques" de Galicia
Por Oskar Viéitez
Entre o 28 de abril e o 2 de maio na zona de Canelas, en Portonovo. terá lugar a primeira gran quedada de autocaravanas e campers con peques de Galicia.
Segundo explican os organizadores, o seu obxectivo é "fomentar a convivencia entre os máis pequenos da casa e concienciar do caravanismo responsable e o coidado do medio ambiente".
A iniciativa xurdiu dun grupo de caravanistas reunidos a través de redes sociais e que tamén coincidiran en eventos anteriores.
Segundo indican, participarán un total de 80 nenos, divididos en 45 autocaravanas e campers.
Ademais de autocaravanistas de Galicia, anotáronse vehículos de comunidades autónomas como Madrid, Asturias, Cantabria ou Estremadura, así como de Portugal e Italia.
Durante esas datas realizaranse actividades lúdicas, comidas e ceas de confraternización, unha actividade solidaria de colaboración cunha asociación de rescate de cans e gatos da zona, onde os participantes aprenderán a importancia da acollida e adopción de animais abandonados e, sobre todo, o xogo de "A busqueda do tesouro" onde, a través de probas físicas, enigmas e orientación, aprenderase a traballar en equipo, o uso de mapas e compases ou a superación de retos persoais.
Entre outros colaboradores, a organización conta cun fabricante de vehículos-vivenda, que achegou uns pequenos detalles para entregar aos nenos, ademais da colaboración da área de autocaravanas da zona de Canelas.