Evacuadas oito persoas dunha familia de Meis tras unha fuga de monóxido de carbono
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
Oito persoas foron trasladadas en Meis con síntomas de intoxicación debido ao mal funcionamento dunha caldeira.
Os servizos sanitarios confirmaron o traslado de catro persoas ao Hospital Provincial de Pontevedra e o das catro restantes ao Hospital de Montecelo.
Ao fío das oito e media da tarde deste pasado domingo, os servizos sanitarios informaban ao 112 Galicia de varios membros afectados nunha vivenda no lugar de Mosteiro, en Nogueira, debido á mala combustión dunha caldeira.
Tras recibir o aviso, o 112 Galicia puxo os feitos en coñecemento dos Bombeiros de Ribadumia, que saíron de inmediato cara o punto. Do mesmo xeito foron informados a Garda Civil e os técnicos da empresa subministradora do gas.
Así, unha vez evacuados os afectados polos profesionais sanitarios, os Bombeiros procederon a realizar as correspondentes medicións, que segundo indicaron, eran negativas. Con todo, indicaron que os técnicos se ocupaban da reparación da avaría.