Localizan, consciente nunha leira, o veciño de Portonovo de 79 anos que desaparecera nas últimas horas
Por Redacción & Anxo Lourido
Arredor das 11.00 horas era localizado Jesús María Padín, un veciño de Portonovo, que desaparecera nas últimas horas cando estaba a pasear pola costa cara a San Vicente. Foi atopado nunha leira da parroquia de Arra, en Sanxenxo. Está consciente, pero foi trasladado a un centro hospitalario para sometelo a un recoñecemento médico completo, segundo informan os servizos do operativo de emerxencias.
Os elementos empregados na busca detectaron un elemento de cor neses terreos e inmediatamente parte do dispositivo activado achegouse ata este punto localizando o veciño, que foi acompañado por axentes da Garda Civil ata a estrada. Alí foi atendido nunha ambulancia que o trasladou ata o centro sanitario.
A Unidade de Drons da Axencia Galega de Emerxencias (AXEGA) colaboraba nas últimas horas no operativo de busca, coordinado pola Garda Civil, co obxectivo de localizar o home que desaparecía ao redor das 16.00 horas do xoves, cando saíu a realizar o seu paseo habitual.
Segundo informaban desde o 112 Galicia e os servizos de emerxencias que realizaban o operativo, o home ten por costume realizar un percorrido pola costa ata San Vicente no Grove, pasando polas praias da Lanzada, Montalvo e por zonas rochosas.
O equipo despregado buscaba, por tanto, entre Portonovo e O Grove desde a madrugada. Participaron amizades e familiares, ademais da Garda Civil, a AXEGA con drons térmicos, o servizo de drons da Garda Civil, a Policía Local, Emerxencias de Sanxenxo e o Seprona. A última vez que o viran atopábase na zona de Canelas e a exploración realizábase pola zona.
O home de 79 anos, cando saíu a pasear vestía un plumífero azul mariño, pantalón marrón e leva lentes. Datos que axudaron a súa localización
No porto de Portonovo establecíase o punto de coordinación do operativo coas forzas de seguridade e incorporouse unha lancha de emerxencias á busca para iniciar unha exploración no mar.