Aparca o seu coche en Corbaceiras e, tres semanas despois, aparece calcinado na Xunqueira de Alba
Por Natalia Puga
A Policía Nacional mantén aberta unha investigación para aclarar as circunstancias que rodearon a aparición dun vehículo totalmente calcinado na Xunqueira de Alba. Trátase dun coche Ford Escort con matrícula de Lugo que estaba aparcado na zona de Corbaceiras e alguén roubou e logo queimou.
Un veciño localizou o vehículo queimado na mañá deste domingo 18 de decembro. Eran as 10.00 horas da mañá e alertou á Policía Nacional, que enviou ao lugar á brigada de Policía Científica.
Os axentes especializados desta unidade lograron pescudar, a través das placas de matrícula do coche que apareceron no chan queimadas, quen é o propietario e puxéronse en contacto con el.
O dono do coche, que reside fóra da cidade, relatou que adoita utilizalo o seu fillo, que vive en Pontevedra. O mozo, de 21 anos, contou que deixara o coche estacionado en Corbaceiras, en concreto, á beira do Gremio de Mareantes, tres semanas atrás.
Segundo o relato deste mozo, levaba tres semanas sen utilizalo e descoñecía que o vehículo fora roubado.
O propietario formalizou unha denuncia ao mediodía deste domingo e agora a Policía Nacional trata de localizar ao responsable.