Pontón acusa a Rueda de estar "escondido detrás de mentiras e manipulacións que queren tapar a desfeita sanitaria"
Por Oskar Viéitez
Creada e actualizada
Creada e actualizada
A portavoz nacional do Bloque Nacionalista Galego (BNG), Ana Pontón compareceu este mércores ante o Hospital Montecelo de Pontevedra para "denunciar a situación de extrema gravidade que está a vivir a sanidade pública no noso país".
A portavoz do BNG culpa deste "colapso, falta de medios e precariedade" ao presidente da Xunta, Alfonso Rueda, ao que acusou de "estar escondido detrás de mentiras e manipulacións que queren tapar a desfeita sanitaria que se está producindo despois de 13 anos de recortes".
"O Partido Popular está a poñer en risco a saúde das persoas", dixo Ana Pontón.
A líder nacionalista reprochou a "xestión caótica" da Xunta pola súa "falta de planificación" e por non "anticiparse" aos problemas e dotar aos centros de saúde e hospitais de "os recursos necesarios para poder atender ás persoas que están enfermas".
Ana Pontón anunciou que catro propostas do BNG dirixidas ao presidente da Xunta. A primeira é "que dea a cara" comparecendo no Parlamento "para explicar á cidadanía que medidas vai tomar o goberno do PP ante a situación de colapso de atención primaria e das urxencias hospitalarias". "Non pode seguir escondido no seu despacho de San Caetano", insistiu Pontón.
O BNG tamén pide a Alfonso Rueda "que rectifique" e poña en marcha un "plan de reforzo de atención primaria dotado con 200 millóns de euros".
A terceira proposta que expón o Bloque ao presidente autonómico é que planifique e aprobe un programa para incorporar novos servizos nos centros de saúde, como especialidades como psicoloxía clínica, xa que segundo os datos que manexan, o 30% das consultas teñen que ver coa saúde mental.
Por último, o BNG pide un plan para eliminar as listas de espera con 149 millóns de euros.
A XERENCIA RESPONDE
O xerente da área sanitaria de Pontevedra, José Flores, saíu ao paso destas declaracións da portavoz nacional do BNG para replicar que este distrito sanitario xestionará o próximo ano 432 millóns de euros. Tamén lembrou que o complexo hospitalario pontevedrés conta cun plan de saúde mental e defendeu as listas de espera. Por último, insistiu en que a falta de médicos dáse en todo o país.