Todo a punto en Sanxenxo para dar este sábado unha luminosa benvida ao Nadal
Por Redacción
Sábado 3 de decembro, ás seis da tarde. É a cita que todos os veciños de Sanxenxo teñen para comprobar o resultado das tarefas de ambientación que se desenvolveron ao longo das últimas semanas para que o municipio dea a benvida ao nadal.
O acto oficial de acendido da iluminación do Nadal celebrarase na Praza de Pascual Veiga e incluirá actividades organizadas polo Concello en colaboración coa asociación Entretendas.
Así, haberá música a cargo de Javi Solla, unha zona glitter e animación para os asistentes. Ademais, repartiranse 350 paus de escuma luminosos led e realizaranse sorteos.
A iluminación do Nadal co que se busca dinamizar a economía local e xerar un ambiente festivo nas rúas permanecerá acendida ata o 8 de xaneiro, desde as 18:30 horas ata a unha da madrugada.
En total, colocaranse 406 elementos decorativos LED que se estenderán por 55.886 metros cadrados do municipio.
Un ano máis, o Concello aposta por levar a decoración do Nadal ás sete parroquias en forma de recunchos ou espazos que convidarán a inmortalizar a visita cunha fotografía.
A empresa Creacións Luminosas encargarase da iluminación despois de que resultase o ano pasado a adxudicataria do servizo durante dous anos por 235.958 euros.
Co aceso dará comezo un amplo programa de actividades que terá como obxectivo espremer ao máximo o ambiente festivo nas rúas, prazas e lugares públicos do municipio.
A actividade continuará a fin de semana na Praza dos Barcos.
O 4 de decembro realizarase unha procura do tesouro, unha actividade pensada para nenos e nenas, de 5 a 12 anos, entre as 11 e as 14 horas.
Pola tarde, ás 17:30 horas, celebrarase Un conto de Nadal, un espectáculo musical-familiar con La Oca Band, no Auditorio de Emilia Pardo Bazán. A entrada é gratuíta.
Relacionadas:
-
Autocine de Nadal na Praza do Mar coa película "Clifford, el perro rojo"
Por Redacción |
-
Os máis pequenos prenden a maxia do Nadal en Sanxenxo
Por Redacción |
-
Poio súmase aos Concellos que prenden o alumeado de Nadal este venres
Por Redacción |
-
Sanxenxo acenderá a súa iluminación do Nadal o 3 de decembro con 406 elementos decorativos led
Por Redacción |