Caldas inicia a tramitación das solicitudes de axuda para os desprazamentos e a atención sanitaria
Por Redacción
O Concello de Caldas iniciou a tramitación das primeiras solicitudes de reembolso dos gastos por desprazamentos para atención sanitaria.
Tal e como se aprobou por unanimidade (PSdG, PP e BNG) na última sesión plenaria, o Concello está disposto a facerse cargo dos gastos adicionais derivados da asistencia sanitaria básica para as persoas máis vulnerables que non son atendidas no PAC de Caldas por falta de persoal.
Estes gastos serían xestionados a través de emerxencia social e para iso, o Departamento de Benestar Social do Concello empezou a estudar as solicitudes correspondentes e a regular o procedemento que se seguirá nestes casos tanto para desprazamentos, atención sanitaria noutros centros e gasto en produtos farmacéuticos.
Ao mesmo tempo, séguense recibindo no Concello denuncias por parte de veciños que protestan polo mal funcionamento do Centro de Saúde e o PAC de Caldas, que continúa moitos días sen persoal médico para atender as urxencias extrahospitalarias.
PROPOSICIÓN NON DE LEI
Por outra banda, o deputado socialista responsable da área de Sanidade, Julio Torrado, reuniuse este martes co equipo de goberno de Caldas para coñecer de preto a problemática da falta de atención médica no PAC que atende tamén aos municipios de Cuntis, Moraña e Portas, trasladándolles a Proposición non de Lei presentada ante a Mesa do Parlamento de Galicia para a súa discusión nas próximas semanas, na que se insta á Xunta de Galicia "a cubrir as baixas dos e das profesionais sanitarios no centro de saúde de Caldas de Reis para non volver a atoparse coa reiterada situación de non ter atención e ter que ser derivados a outras vilas, onde tampouco existe a seguridade de ser atendidos".
Á súa vez, o alcalde anunciou a súa intención de asistir á manifestación en defensa da sanidade pública convocada polo BNG o vindeiro domingo, ás 12 do mediodía, desde a Plazuela ata o Centro de Saúde.
Ao mesmo tempo, informou que o vindeiro martes, ás 18 horas, celebrarase unha reunión con organizacións sociais, sindicais e políticas no Auditorio Municipal coa finalidade de crear unha Plataforma SOS Sanidade Pública na comarca de Caldas. Na mesma analizarase a situación dos centros de saúde, pediatría e do PAC, e valoraranse medidas de presión ante a administración para buscar saídas á mesma.
Relacionadas:
-
PSOE e PP únense no Parlamento de Galicia para pedir á Xunta que cubra as baixas de persoal sanitario en Caldas
Por Redacción |
-
Masiva protesta en Moraña pola falta de médicos no centro de saúde
Por Redacción |
-
O Concello promove a constitución dunha Mesa para a Defensa da Sanidade Pública en Caldas
Por Redacción |
-
Reposición urxente do servizo de Pediatría na Illa de Arousa, petición do alcalde a García Comesaña
Por Redacción |
-
O "Patuco de honra" recoñece o labor do equipo de Enfermaría de neonatos do Complexo hospitalario de Pontevedra
Por Redacción |
-
Cerdedo pola Sanidade Pública continúa presentando reclamacións no centro de saúde
Por Redacción |
-
Montse Prado, do BNG, afirma que a área sanitaria de Pontevedra-O Salnés é o "banco de probas" do PP para desmantelar a sanidade
Por Anxo Lourido |
-
A Área Sanitaria anuncia que ofertará a cobertura de todas as prazas de Medicina Familiar e Pediatría en Poio
Por Redacción |
-
A falta de médicos no PAC provoca un Pleno Extraordinario no Concello de Caldas de Reis
Por Oskar Viéitez |
-
Caldas de Reis estala ante o enésimo día sen médicos no centro de saúde
Por Redacción |