Empresarios arousanos valoran a "visión de futuro" das infraestruturas do porto de Vilagarcía
Por Redacción
Empresarios da comarca de Arousa valoraron este luns o esforzo realizado pola Autoridade Portuaria de Vilagarcía nos últimos anos para a mellora das súas infraestruturas "con visión de futuro" e destacan que as actuacións realizadas permitiron mellorar tanto os seus calados coma superficies de almacenamento e conexións viarias e ferroviarias.
Os representantes da patronal arousana realizaron estas afirmacións durante unha visita ao porto do presidente da Confederación de Empresarios de Galicia, José Manuel Fernández Alvariño, e o presidente da Confederación de Empresarios de Pontevedra, Luis Novoa.
Tras a visita, Luis García-Reboredo, directivo da Federación de Empresarios da Comarca de Arousa, valorou que as infraestruturas dos últimos anos derivaron en que o porto de Vilagarcía "é un porto moi atractivo para empresas tanto do seu hinterland (zona xeográfica de influencia económica) como de fóra da súa zona de influencia".
O presidente da Cámara de Comercio, Industria e Navegación de Vilagarcía, Miguel Falcón, e o presidente da Federación de Empresarios da Comarca de Arousa, José Luis Vilanova, resaltaron que a comercialización destas infraestruturas é fundamental para aproveitar ao máximo as potencialidades do porto arousano.
A visita de Fernández Alvariño serviu para que coñecese os proxectos de futuro do porto arousano que, unha vez rematada a fase de desenvolvemento das súas infraestruturas que caracterizou a súa xestión nos pasados anos, está agora centrado na explotación e comercialización dos seus equipamentos e servizos.
Neste sentido a presidenta do porto, Sagrario Franco, resaltou que o Plan Estratéxico da entidade, que abrangue o período 2013-2017 presta especial atención ao papel do Porto de Vilagarcía como dinamizador económico. "ÿ tamén -engadiu a presidenta- un plan de Comunidade Portuaria, que pretende xuntar os esforzos das empresas usuarias do porto para lograr un incremento de tráficos e unha mellora na conectividade exterior do territorio".
Franco Malvar destacou a importancia do empresariado na actividade do porto, "xa que son as grandes compañías e as pemes asentadas na nosa zona de influencia as que van utilizar os nosos servizos e infraestruturas para ampliar ou consolidar a súa actividade comercial e industrial".
Pola súa banda, Fernández Alvariño resaltou o papel que lle corresponde ao sistema portuario galego no fortalecemento da economía e engadiu que "unha oferta global dos portos galegos significa oportunidades para todos, presentándonos como unha unidade de destino" que saque partido ao posicionamento da fachada atlántica galega nas grandes rutas do transporte marítimo internacional.