O Verdugo, en alerta por risco de desbordamento en Ponte Caldelas
Por Redacción
Elevan a alarma en Ponte Caldelas. A Dirección Xeral de Emerxencias e Interior activou o plan especial ante o risco de inundación en Galicia (INUNGAL) ante o posible desbordamento do río Verdugo.
A situación de alerta esténdese a outros tres ríos galegos, entre eles o Deva, no municipio pontevedrés de Arbo.
Segundo a información recibida mediante os sistemas de control e seguimento, ao superar os limiares establecidos, os cursos destes ríos están a presentar un crecemento significativo dos seus caudais, polo que poden chegar a darse inundacións puntuais.
A pesar da intensidade das precipitacións caídas ao longo das últimas horas, non se rexistraron incidencias de consideración na contorna dos leitos que están baixo observación.
Desde o 112 Galicia, lémbrase a necesidade de incrementar a precaución nas contornas e estradas próximos a pontes ou torrentes, xa que a subida repentina dos caudais pode xerar dificultades na circulación.