Detidos os responsables da onda de furtos de bicicletas e patinetes eléctricos dos últimos meses en Pontevedra
Por Natalia Puga
A Policía Nacional logrou esclarecer 18 furtos de bicicletas e patinetes eléctricos que se rexistraron nos últimos meses en centros educativos e na estación de tren de Pontevedra.
No marco da bautizada como operación 'Curro', os investigadores lograron localizar os responsables dos furtos, que consideran que formaban un grupo criminal agora desarticulado dedicado á subtracción destes vehículos en Pontevedra para logo trasladalos a outra localidade galega e tratar de "colocalos" en establecementos de compravenda de artigos de segunda man.
A operación pechouse coa detención de catro persoas. Tres deles son galegos e un de orixe catalá e todos teñen antecedentes policiais por feitos similares en diferentes puntos da xeografía española.
As investigacións iniciáronse a principios do mes de abril cando os axentes constataron que se estaban producindo furtos de bicicletas e patinetes eléctricos de gama media alta nos arredores dos centros educativos e na estación de tren da cidade de Pontevedra.
As pescudas realizadas permitíronlles pescudar a existencia dun grupo perfectamente organizado composto por catro homes.
Esta operación é resultado do traballo dos axentes do grupo II da Brigada de Policía Xudicial da Comisaría de Pontevedra coa colaboración da Xefatura Superior de Galicia. Ademais, na detención dos catro sospeitosos colaboraron axentes da Comisaría local de Eivissa.
As bicicletas e os patinetes eléctricos subtraídos, teñen un valor de 16.000 euros e a Policía Nacional logrou recuperar sete bicicletas, seis delas na Coruña e unha sétima en Vigo. As sete xa foron entregadas aos seus propietarios.