Adeus aos vestiarios, aseos e cantina do vello campo de fútbol de Dorrón
Por Redacción
Os vestiarios, aseos e cantina do vello campo de fútbol de Dorrón, en Sanxenxo, empezan a ser historia. O Concello comezou esta semana a derriba das instalacións, unha actuación cuxo custo ascende a 38.381 euros.
A demolición destas edificacións foi supervisada polo alcalde, Telmo Martín, e é o paso previo á licitación do novo proxecto que se atopa en fase final de redacción.
Os traballos de derriba inclúen tamén os desmontes necesarios para aproveitar ao máximo o novo equipamento deportivo, así como o acondicionamento da parcela.
A entrada ao campo mantense e nela situarase unha nova cantina e aseos para o público. Diante destas novas instalacións resérvase un amplo espazo de estancia desde onde se poderán divisar os partidos aproveitando a altura nesa zona da parcela.
As novas instalacións contemplan, no exterior o acondicionamento das zonas anexas ao campo cun aparcamento con aproximadamente 30 prazas.
En canto ao muro perimetral que pecha as instalacións contémplase a mellora do xa existente e a construción dunha parte nova na zona na que se amplía a parcela.
No terreo de xogo colocarase céspede artificial de última xeración con rega sobre unha base de aglomerado en quente e catro torretas de iluminación led alumarán o campo. En canto ao equipamento deportivo, colocaranse as porterías e os bancos.
As bancadas actuais acondicionaranse cunha nova cuberta e construiranse dous novos vestiarios para os equipos e dous para os árbitros. Nesa mesma edificación inclúese un almacén e unha oficina.