Calquera persoa que teña interese na natureza ten ocasión de participar esta fin de semana na proposta que organizou AECAM, a Asociación Educativa e Cultural Animais do Mundo.
Trátase da I Xornada de Biodiversidade que se desenvolverá no Centro Social de Salcedo este domingo 25 de setembro a partir das 10.30 horas. Convidamos os promotores de AECAM, Fátima Otero e Roberto Díaz ao podcast 'Cara a cara' para falarnos da iniciativa.
O obxectivo da xornada é "achegar a natureza que temos ao redor", "non imos falar deses grandes mamíferos africanos, senón deses animais que temos ás portas de casa que moitas veces descoñecemos a súa forma de vida e tamén as súas problemáticas", avanzan en PontevedraViva Radio. Resulta practicamente excepcional poder contar con tal diversidade de expertos nunha mesma convocatoria.
Abrirá Roberto Díaz falando de "eses pequenos aliados que son os insectos, aos que vinculamos coas plantas e como inflúen noutras especies como o lobo e o oso, sen os cales estes non serían nada". Xosé Pardavila, do Grupo de Estudo dos Animais Salvaxes, falará doutros pequenos carnívoros como jinetas, teixugos, garduñas..., "esquivos e difíciles de ver, pero moi próximos ás cidades".
Pablo González falará de aves, as súas ameazas e problemática. Jesús Criado, do Grupo Lobo Galicia, ocuparase de abordar a súa xestión e problemática. César Agres, de Asociación Herpetológica Española, ocuparase dos anfibios e réptiles "que son especies con mala fama pero con importancia fundamental tamén" e Martín Carral, especialista en oso pardo cantábrico, centrarase nestes animais.
A organización contou coa colaboración da Concellería de Benestar Animal do Concello de Pontevedra e é ademais unha xornada inclusiva na que participa XOGA, polo que se ofrecerá tamén en lingua de signos.
A asistencia é gratuíta, está pensada para calquera persoa con interese na natureza, profesional ou non e desde menos a máis idade. Só é necesario inscribirse chamando ao 667 231 974 ou enviando un correo electrónico a info@aecamgalicia.com