A Xunta inaugura "o primeiro treito da ronda urbana"
Por Oskar Viéitez
O Conselleiro de Medio, Territorio e Infraestruturas, Agustín Hernández, acudiu este martes a Pontevedra para inaugurar o desdobramento da estrada O Pino - Bora (PO-542), o acceso ao futuro Hospital de Monte Carrasco.
"Non teño ningunha dúbida de que o treito entre o Nudo de O Pino e esta primeira glorieta vai constituir o primeiro treito da ronda urbana de Pontevedra, polo tanto, hoxe inauguramos o primeiro treito desa ronda", proclamou Agustín Hernández.
O titular de Infraestruturas da Xunta sinalou que esta actuación pon en valor esta zona da cidade e supón "o inicio dun novo eixo de comunicación para Pontevedra", dixo o conselleiro. Trátase dun vial de 1,3 quilómetros no que se investiron 10,15 millóns de euros, incluídas as expropiacións, para unha estrada con capacidade para soportar 10.000 vehículos ao día.
"Creo que co paso do tempo demostrouse que ésta era una solución lóxica que permite dar continuidade a unha actuación como é o Nudo de O Pino que vai permitir ter un aceso de capacidade ao novo Hospital e por en valor esta zona do Concello de Pontevedra, cun tratamento de vía urbana, con dúas zonas de aparcamento e beirarrúas de dous metros", argumentou o conselleiro.
Hernández que estivo acompañado polo delegado territorial da Xunta, José Manuel Cores Tourís, e o grupo municipal do Partido Popular ao completo, lamentou "profundamente" que non estivese presente o alcalde de Pontevedra, Miguel Anxo Fernández Lores.
"Nós temos por costume facer invitación a todos os nosos actos, por suposto, ao alcalde do Concello", concluiu Hernández, "lamento profundamente que neste caso o alcalde e os concelleiros que cogobernan neste concello non asistiran a comprobar o resultado dun investimento que beneficia a toda Pontevedra".