Agustín Hernández esixe "unha rectificación e unha desculpa" ao alcalde polos cambios na Barca
Por Oskar Viéitez
O conselleiro de Medio Ambiente, Territorio e Infraestruturas, Agustín Hernández, esixiu unha rectificación e unha desculpa ao alcalde de Pontevedra, Miguel Anxo Fernández Lores, polos cambios de tráfico aplicados no ámbito da ponte da Barca. Agustín Hernández fixo estas declaracións aos medios de comunicación este martes en Pontevedra durante a posta en servizo da recén desdobrada estrada Pino-Bora.
O conselleiro referiuse a este polémica como "un problema que creou o Concello de Pontevedra", e recordou que dende o seu departamento, "advertimos ao Concello coa máxima transparencia e total lealdade que pensabamos que o tema do peche da ponte da Barca non estaba suficientemente estudado".
Neste sentido, Hernández asegurou que "pedimos que se analizase a cuestión con profundidade, prestamos toda a nosa colaboración a ese estudo", non obstante "o alcalde de Pontevedra neste caso demostrou que cando os informes técnicos non son do seu agrado o que fai e cargar contra aquel que informa lealmente dos problemas que pode ter coa adopción dunha medida".
O responsable de Infraestruturas da Xunta, administración titular da ponte da Barca, insistiu en que o goberno local de Pontevedra, "adoptou unha medida errada, que está a producir un perxuicio moi importante non soamente a unha parte importante dos veciños de Pontevedra senon tamén de boa parte da provincia e agora o que ten que facer, na miña opinión, é rectificar, e debería tamén pedir desculpas", concluíu.