A 'volta ao cole' volve a ser unha festa no centro histórico
Por Redacción
Tras non poder celebrala os dous últimos anos pola pandemia, a gran festa de volta ao cole que organizan os comerciantes de Zona Monumental está de volta.
Un día antes de que os máis pequenos regresen ás aulas, o mércores 7 de setembro, as principais prazas do centro histórico converteranse en todo un campo de xogos.
As actividades desenvolveranse entre as 16:30 e as 20:30 horas.
Na praza de Curros Enríquez haberá un taller de arte colaborativa e un rocódromo de oito metros, mentres que Méndez Núñez acollerá un taller de pinta caras e unha ludoteca creativa.
Pola súa banda, en Valentín García Escudero haberá un taller de manualidades e na rúa Serra, diante da praza de abastos, unha pista americana e un crocodilo inchable.
A programación incluirá, como é tradición, coa festa da escuma, que será ás sete da tarde na Praza da Pedreira, na que un DJ amenizará a velada.