O mosteiro de Armenteira súmase á dixitalización do 'Tourist Inside'
Por Redacción
O punto de información turística do mosteiro de Armenteira, en Meis, súmase á dixitalización grazas ao proxecto europeo 'Tourist Inside' promovido pola Deputación de Pontevedra.
Ata alí se desprazaron a deputada de Turismo, Ana Laura Iglesias, e a tenente de alcaldesa de Meis, Araceli Maquieira, onde deron a coñecer as novidades que transformarán esta oficina aproveitando o potencial que ofrecen as últimas tecnoloxías de información e comunicación.
Con este punto de información buscarán a total inclusión das persoas con dificultades de audición na súa oferta turística ao incorporar un bucle magnético, que lles axudará a desfrutar por completo das visitas guiadas. A oficina contará tamén no seu interior cunha tableta na que as e os visitantes poderán realizar enquisas de satisfacción.
Tamén instalarán 'beacons' en 10 puntos de distintos lugares do territorio de Meis, é dicir, balizas electrónicas que transmitirán información de interese aos móbiles das e dos visitantes a través da tecnoloxía bluetooth.
Deste xeito, a oficina mellorará os servizos que ofrece e que xa en 2017 fixérona merecedora da 'Q' de Calidade turística, o distintivo que outorga o Instituto para a Calidade Turística Española (ICTE) e que converte á oficina nunha referencia na atención aos visitantes, dado o grao de cumprimento dos estándares e procedementos certificados.
MÁIS DE 3.000 VISITANTES EN 2022
Ata o punto de información turística do mosteiro de Armenteira achegáronse no que vai de ano un total de 3.062 persoas en busca de información, dos que un 88% foron visitantes nacionais chegados en gran maioría de Madrid, Badaxoz e Biscaia. O 12% restante corresponde ao turismo estranxeiro de Italia, Portugal ou Alemaña.
A Rede Info Rías Baixas conta con 33 oficinas adheridas e espalladas por toda a provincia de Pontevedra para garantir un servizo de atención de calidade nas oficinas de turismo dotándoas de máis medios, de novas tecnoloxías e dunha imaxe unificada a fin de mellorar o grao de satisfacción dos e das visitantes.
Relacionadas:
-
Os socialistas requiren "explicacións urxentes" polo "peche con nocturnidade" da oficina de turismo do Mosteiro de Armenteira
Por Redacción |
-
14 tótems na provincia xa proporcionan información turística en tempo real
Por Redacción |
-
As irmáns Mendoza 'reviven' como anfitrioas da oficina "máis sorprendente, dixital e inclusiva" de Rías Baixas
Por Alejandro Espiño |
-
O Palacete das Mendoza recibe un investimento de 350.000 euros do proxecto europeo Tourist Inside
Por Oskar Viéitez |
-
A Deputación recibe outro premio pola súa aposta pola dixitalización do destino turístico Rías Baixas
Por Redacción |
-
A Deputación destinará 220.000 euros para continuar profesionalizando as oficinas de Turismo Rías Baixas
Por Redacción |
-
A Mesa Provincial do Camiño incorpora aos concellos do roteiro Xacobeo do Mar de Arousa e Río Ulla
Por Redacción |