Xeve prepara os disfraces para celebrar o primeiro Verantroido este sábado 27
Por Alejandro Espiño
Creada e actualizada
Creada e actualizada
Os disfraces tamén son para o verán e, por este motivo, a asociación SondeXeve organiza a primeira edición de Verantroido, un evento previsto para a tarde deste sábado 27 de agosto na contorna do antigo Concello de Xeve.
Con esta festa, que nace con vocación de continuidade, os organizadores buscan fomentar a "unión entre parroquias", especialmente entre os 'tres Xeves': Santa María de Xeve, Santo André de Xeve e Verducido. "A xente animouse moito e estamos a notar unha extraordinaria colaboración", explicou o presidente de SondeXeve, Manolo Hermida.
O Verántroido será un evento "con moita diversión e música", segundo detallou Ana Llevot, con actividades para todos os públicos.
A partir das 18:00 horas, os participantes na festa poderán divertirse de balde cos inchables e o touro mecánico que se instalarán na zona. Todas estas atraccións serán de balde para os que decidan probalas.
A charanga Mil9 amenizará a xornada, na que tamén haberá servizo de barra coa Cantina do Roxo e bocadillos de salchicha e filloas realizadas polo propio colectivo SondeXeve.
A partir das 21:00 horas actuará Dan Ale, recanteiro da Mariña, coñecido pola súa participación no programa Luar da Televisión de Galicia. A continuación, a música será a protagonista coa discoteca móbil e a participación de DJ Josinho e de DJ Bruno.
Entre as persoas que acudan disfrazadas a esta festa realizarase un sorteo de agasallos.
"Estamos moi orgullosos do traballo feito e moi ilusionados con este proxecto", sinalaron desde SondeXeve, que impulsan este entroido de verán "coa esperanza de repetir" en anos sucesivos.
O mesmo apuntou a edil Pilar Comesaña, presente na presentación deste entroido, que sostivo que "están traballando a reo todos os veciños e veciñas, hai moitos implicados, e teñen unha ilusión tremenda en que esta festa vaia para adiante, que haxa animación, e de seguro sairá ben".