A pista entre Noalla e O Castro (Vilalonga) será reasfaltada
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O mal estado no que se atopa a pista que une Noalla e O Castro (Vilalonga) será pronto cousa do pasado. O goberno municipal de Sanxenxo investirá máis de 64.000 euros para reasfaltar este vial, mellorando as súas condicións e facilitando o acceso aos residentes.
Esta actuación será posible tras a obtención dunha subvención de 53.000 euros por parte da Axencia Galega de Desenvolvemento Rural (Agader).
A actuación expón executar unha nova capa de rodadura sobre o pavimento asfáltico existente, que está moi deteriorado actualmente, para mellorar a calidade e seguridade viaria.
Trátase dun vial cunha elevada densidade de tráfico, cunha lonxitude de 1.176 metros e un ancho de plataforma medio entre 4,50 e 5 metros na maior parte do seu percorrido.
Os traballos, que serán licitados de maneira inminente, darán comezo coa limpeza das marxes e a apertura das beiravías existentes ao longo do vial.
A superficie total a pavimentar será de 5.560 metros cadrados. Establécese un prazo de execución das obras dun mes, segundo o programa de traballos establecido.