A rapa das bestas, en formato habitual, regresa este domingo ao Monte Castrove
Por Redacción
O Monte Castrove recupera este ano unha das súas citas máis emblemáticas. A Baixada das Bestas ao curro de San Ramón volve neste 2022 retomando a súa programación habitual, logo de que a edición do ano pasado estivese marcada polas restricións derivadas da pandemia da covid-19. Trátase dun evento que está organizado pola Asociación de Ganaderos Monte Castrove e que conta coa colaboración do Concello de Poio.
O día grande do encontro será este domingo 21, se ben as actividades xa comezarán o sábado. Será entón cando se leve a cabo a xuntanza dos cabalos no Pastizal. Pola noite, a velada estará amenizada por un DJ. Xa na xornada dominical, ás 11.30 horas está prevista a baixada ao curro. Posteriormente, ás 13.00 horas, terá lugar unha misa na honra de San Ramón. Pola tarde, ás 16.30 horas, levarase a cabo o marcado e a rapa das bestas por parte dos aloitadores, ademais da venda de exemplares.
Unha vez rematada esta actividade, en torno ás 20.30 horas, a organización sorteará dous potros. Ás 21.00 horas rematará a programación coa solta das bestas no monte.
O Concello de Poio lembra que a asistencia a este evento é gratuíta e amosa a súa satisfacción polo feito de que a asociación organizadora poida retomar, logo de dous anos de ausencia, unha cita que “conta cunha enorme tradición”.