A Policía Local incauta 520 artigos supostamente falsos a un ambulante que vendía sen autorización
Por Redacción
A Policía Local de Vilagarcía incautou este domingo a un ambulante que vendía sen o preceptivo permiso municipal no Parque Miguel Hernández un total de 520 artigos (prendas de vestir e complementos) supostamente falsificados.
O material consistía en diversas prendas deportivas, equipamentos de clubs, carteiras, rileiras e roupa interior masculina de marcas rexistradas moi coñecidas, rotuladas e etiquetadas cos logos das respectivas casas, pero que carecían dos embalaxes e caixas nos que os venden as distribuidoras oficiais. Ademais, o ambulante carecía de documentación que acreditase a procedencia do material.
Ante a sospeita de estar ante un presunto delito contra a propiedade industrial, a Policía identificou ao vendedor, E.N.S., de 49 anos e residente en Ribeira, e procedeu á incautación de toda a mercancía, a cal supuxo un total de 31 bultos. Despois de inventariar unha a unha as pezas incautadas, o material foi entregado nas dependencias da Comisaria da Policía Nacional onde continuarán as correspondentes dilixencias.