Multa de 960 euros por pegar patadas e golpes a dúas mulleres ao berro de "voute matar, denunciaches o meu irmán"
Por Natalia Puga
A sección segunda da Audiencia Provincial de Pontevedra acaba de confirmar unha condena a unha muller que en xullo de 2021 lesionou con golpes e patadas outras dúas mulleres coas que mantivo un enfrontamento no barrio da Seca.
A muller xa fora condenada polo Xulgado de Instrución número 1 de Pontevedra e presentou un recurso alegando que non son certos os feitos polos que lla condena e todo ocorreu doutra forma e en presenza de numerosas testemuñas.
Con todo, finalmente a sección segunda da Audiencia acaba de ditar unha sentenza na que conclúe que o recurso de apelación non pode estimarse porque ela non acudiu ao primeiro xuízo que se celebrara "a pesar de estar citada en legal forma", de maneira que non pode alegar agora unha serie de feitos que non dixo no acto do xuízo, sen que acreditase ningunha das circunstancias que di que ocorreron, ao non presentar testemuña algunha.
Desta forma, finalmente a Audiencia confirmou a sentenza, que condena esta muller como autora de dous delitos leves de lesións ao pago dunha multa de 480 euros por cada delito, isto é, 960 euros. En concreto, a multa é de dous meses a razón de 8 euros diarios.
Ademais, a muller debe indemnizar ás súas dúas vítimas con 118 euros a cada unha, isto é, con 236 euros en total.
Os feitos polos que foi condenada ocorreron sobre a medianoite do 18 de xullo de 2021, cando tres irmás acudiron a buscar a súa furgoneta ao lugar no que supoñían que estaba estacionada. Cando camiñaba, pola zona da Seca, unha delas atopouse coa irmá da súa ex parella, que a agrediu.
Segundo recolle a sentenza, agarrouna polo pelo á vez que lle dicía "voute matar, denunciaches ao meu irmán", e propinoulle patadas e golpes. Unha das súas irmás interveu para separalas e a muller tamén a agrediu a ela patacas e puñadas tamén a ela.
Finalmente, foi necesario que interviñesen terceiras persoas para que cesase na agresión e dúas das irmás sufriron lesións nos brazos, o peito e unha tamén nunha perna.