Condenado por coaccións un mozo que perseguiu á súa ex e asustouna tanto que se viu obrigada a saír sempre acompañada
Por Natalia Puga
Un mozo pontevedrés acaba de ser condenado a seis meses de prisión por un delito de coaccións sobre a muller pola presión que exerceu sobre a súa ex noiva unha vez rota a súa relación. Debido ao comportamento do acusado, o seu ex viuse obrigada a ter que saír acompañada e a manter contacto continuo coa súa nai informándoa de onde se atopaba en cada momento.
O relato das coaccións comeza no mes de decembro de 2019, uns meses despois de que a moza puxese fin á relación. O mozo tiña entón 23 anos e ela, 20. Tras dous anos de relación, ela deixoulle no verán de 2019.
En decembro, segundo considera probado a sección segunda da Audiencia Provincial de Pontevedra, o acusado comezou a chamar á súa ex. Nese mes constan catro chamadas o día 5, unha o día 6, unha o día 7, unha o día 10, unha o día 11 e outra o día 15.
Ademais, tentou poñerse en contacto con ela, a través de familiares e o 5 de decembro envioulle ao compañeiro sentimental da súa nai unha carta dirixida a ela chea do que o tribunal cualifica de "despropósitos e expresións absurdas e desasosegantes".
Na madrugada do 15 de decembro, sobre as 1.40 horas, o acusado atopouse por casualidade coa súa ex nunha rúa de Pontevedra e, ao vela, aínda que ela tratou de evitalo, perseguiuna por toda a rúa e en estado de agresividade. Para evitar que se fose, agarrouna por un brazo, tirando dela para freala e poñéndoselle diante para impedirlle o paso.
Nese contexto, díxolle "puta, ridícula, estúpida, si vas de feminista como me puedes denunciar" (sic).
A pesar de que a moza lle dicía que a deixase, o acusado mantivo esta situación ata que interviñeron dous amigos da muller, que resultaron lesionados durante o incidente. O seu caso está na vía xudicial noutra causa diferente.
Ademais de seis meses de prisión, a Audiencia impuxo ao acusado a prohibición do dereito á tenencia e porte de armas durante un ano e un día e a prohibición de aproximarse á súa vítima, a unha distancia inferior de 300 metros.
Esta orde de afastamento impídelle achegarse ao seu domicilio, lugar de traballo ou estudo e lugares que ela frecuente durante un ano e seis meses e prohíbelle tamén comunicarse con ela por correo, teléfono, calquera medio informático ou telemático, ben directamente ou por calquera outro medio durante o mesmo tempo.
Este mozo foi condenado en primeira instancia polo Xulgado do Penal número 4 de Pontevedra tamén por un delito de acoso, pero a Audiencia revisou a condena por mor dun recurso presentado polo acusado, cambiou o relato de feitos e decidiu absolvelo por ese delito e condenalo tan só por coaccións.
Contra esta sentenza pódese presentar recurso ante o Tribunal Supremo.