O TSXG confirma penas de 3 e 5 anos de cárcere para dous ladróns reincidentes que roubaron sete móbiles iPhone
Por Natalia Puga
O Tribunal Superior de Xustiza de Galicia (TSXG) acaba de confirmar unha sentenza que condena a tres anos e medio e cinco anos de cárcere a dous ladróns reincidentes que en setembro de 2020 roubaron sete teléfonos móbiles marca Apple do Hiper Froiz de Pontevedra.
A Sala do Civil e Penal do TSXG revisou o caso tras recorrer os condenados unha sentenza previa da sección cuarta da Audiencia Provincial de Pontevedra e decidiu desestimar os recursos e confirmar integramente o fallo do tribunal pontevedrés.
Os dous acusados están considerados coautores dun delito de roubo con forza nas cousas e no caso dun deles aplícase a circunstancia agravante de reincidencia. Ambos tiñan condenas previas, pero uno tan só fora condenado a seis meses de prisión por un delito de roubo con forza en Madrid no ano 2015 mentres que ao outro lle constan sete condenas previas con sentenza firme en Madrid e Burgos por delitos de furto e roubo con forza.
A este acusado multirreincidente a Audiencia primeiro e o TSXG despois condenárono a cinco anos de prisión mentres que ao outro lle impuxeron a pena de tres anos e medio. Ademais, ambos deben indemnizar conxunta e solidariamente a Distribucións Froiz con 5.695 euros polo valor dos teléfonos subtraídos e non recuperados.
Ambas as sentenzas consideran probado que cometeron o roubo sobre as 18.06 horas do 18 de setembro de 2020. Puxéronse previamente de común acordo e, con ánimo de obter beneficio ilícito, entraron o establecemento da rúa Cobián Roffignanc, dirixíronse a unha vitrina pechada con chave en cuxo interior se atopaban teléfonos móbiles e levaron sete de distintos modelos de iPhone.
Segundo a sentenza, un deles, o que ten menos antecedentes, realizou labores de vixilancia colocándose de maneira que o outro non puidese ser visto. O multirreincidente violentou a fechadura da vitrina e apoderáronse dos sete teléfonos: tres Iphone 11 de 128 GB valorados en 899 euros cada un, un Iphone 8+ valorado en 769 euros, dous Iphone XR 128DB valorados en 765 euros cada un e un Iphone XS64 GB valorado en 699 euros.
Despois, abandonaron o establecemento e os teléfonos móbiles nunca foron recuperados.