Sés e Baiuca abren as 'En3vistas' no campillo de Santa María
Por Mónica Patxot & Oskar Viéitez
Dous músicos, Sés e Baiuca; unha xornalista, Susana Pedreira, e un escenario, o campillo de Santa María, con todos eles empezou este luns o ciclo “En3Vistas” programado pola Concellaría de Normalización Lingüística.
Dez persoeiros de distintos ámbitos falan do seu día a día reparando na normalidade do uso do galego.
Susana Pedreira conduce a conversa a partir das 20 horas en distintos espazos públicos da cidade, amosando a recuperación que se ten feito dos distintos lugares.
Onte a temática abordada foi a música pero nos vindeiros días falarase de literatura, do eido empresarial, da ciencia e da creatividade dixital.
Así, este martes 19 de xullo ás 20:00 horas no cruzamento das rúas Peregrina e Daniel de la Sota será a quenda para a literatura con Ledicia Costas, unha das grandes escritoras galegas con vinte libros publicados e multipremiada, e as promotoras do proxecto editorial Apiario, ademais de escritoras, Antía Otero e Dores Tembrás.
O mércores 20 de xullo na Ponte do Burgo ás 20:00 horas falarase de "cultura feita coas mans" a través de Elena Ferro, empresaria coa marca Eferro que reinventou a fabricación e deseño dos zocos na terceira xeración dunha tradición familiar que arrincou en 1915, e Jordi 'Aí Falaches', que presentará a firma con este último nome e a súa experiencia como catalán que dende hai dez anos reside en Galicia e crea e se expresa en galego.
Os Xardíns de Marescot acollerán o xoves 21 ás 20:00 horas a conversa entre Ángel Carracedo, director da Fundación Pública Galega de Medicina Xenómica e un dos científicos galegos máis recoñecidos, e a escritora Loli Beloso, que fai labor de divulgación de persoeiros galegos menos coñecidos e que promove a Festa da Investigación que anualmente se celebra en Tomeza.
Pecharase o ciclo o venres 22 de xullo no antigo convento de Santa Clara ás 20:00 horas cunha aposta polo audiovisual en galego a través de tres activistas, especialmente nas redes sociais, por unha lingua inclusiva e unha sociedade para todes. Nee Barros, Eric Dopazo e María Rúa Rodríguez formarán parte deste encontro.
A xornalista de Onda Cero e co-fundadora do congreso 'As mulleres que opinan son perigosas' Susana Pedreira conducirá as cinco en3vistas, que se poderán seguir en directo a través da canle de Instagram do Servizo de Normalización Lingüística do Concello de Pontevedra: @lingua_pontevedra. Posteriormente, as conversas serán colgadas na web snl.pontevedra.gal/en3vistas/, onde xa se poden visionar os vídeos das últimas edicións.