A cidade de Pontevedra adheriuse formalmente a #hepCityFree, unha campaña que anima a acelerar a eliminación da hepatite C, de forma que no horizonte do ano 2024 os casos de infección sexan practicamente residuais.

A través dunha declaración institucional, que leu no pleno o doutor Juan Turnes, xefe do servizo de Dixestivo do Complexo Hospitalario de Pontevedra, a corporación comprometeuse a apoiar a loita contra esta enfermidade, para a que non existe vacina.

A este respecto, a cidades son, segundo os expertos, fundamentais para acelerar a eliminación da hepatite C, pois nelas rexístrase o maior número de persoas que viven co virus.

Sumarse a #hepCityFree levará a Pontevedra a colaborar en campañas de sensibilización e cribados entre a poboación de 40 a 65 anos, en iniciativas encamiñadas a reducir prácticas de risco ou en impulsar políticas de prevención entre os colectivos máis vulnerables.

Ademais, o goberno municipal comprométese a facer cumprir as condicións hixiénico-sanitarias adecuadas en establecementos que fagan tatuaxes ou realizar estudos que demostren os resultados dos programas realizados na cidade.

"O reto que temos é de simplificación, integración e descentralización, e por iso, os concellos poden ter un papel crave para chegar, desde os servizos comunitarios e xunto aos axentes e ONG que traballan na cidade a aqueles colectivos de risco que, ou ben chegan tarde, ou non chegan, ao sistema sanitario", explicou o doutor Turnes.