Activan a alerta máxima por calor en todas as Rías Baixas
Por Redacción
As temperaturas que se esperan para os próximos días, que alcanzarán máximas de 36 graos, levou á Xunta de Galicia a declarar a alerta máxima por episodios de calor nas Rías Baixas. Tan só quedarán fóra os trece municipios do Baixo Miño.
Así, advirte dos posibles efectos das altas temperaturas sobre a saúde en Barro, Bueu, Caldas, Cambados, O Grove, A Illa de Arousa, Marín, Meaño, Meis, Pontevedra, Portas, Poio, Ponche Cakdekas, Ribadumia, Sanxenxo, Vilaboa, Vilagarcía de Arousa ou Vilanova de Arousa.
Tamén se activa esta alerta máxima en municipios do interior da provincia como Campo Lameiro, Cerdedo-Cotobade, Cuntis, A Lama ou Moraña, entre outros, xunto con todos os municipios das comarcas de Deza, Tabeirós-Terra de Montes, O Morrazo ou Vigo.
Meteogalicia informa que os próximos días continuaremos baixo a influencia das altas presións estacionarias ao norte da Península, xerando unha circulación do nordés que se ira debilitando progresivamente. Esta situación favorece a entrada de aire moi cálido africano.
Espérase así un episodio de calor, especialmente ao oeste de Pontevedra. O domingo, a posible formación de néboas costeiras nas Rías Baixas reducirá a intensidade do episodio de calor.
CONSELLOS PARA A CALOR
Debido a estas condicións, Sanidade recomenda beber máis líquido do habitual sen esperar a ter sede, sobre todo auga e zumes de froita lixeiramente fríos. Ademais, suxiren evitar inxerir bebidas quentes, alcohólicas, café, té e as moi azucradas.
Respecto da vestimenta, débese usar roupa de tecidos naturais, lixeira e folgada, de cores claras, chapeus, lentes de sol e cremas solares. O calzado deberá ser cómodo e transpirable.
É conveniente non ir á praia nas horas de máxima calor nin, na medida do posible, facer actividades físicas baixo o sol. No caso de estar na casa, recomendan baixar as persianas e pechar as xanelas, abríndoas pola noite para ventilar.
Nos momentos de calor máis intensa pódese refrescar o corpo cunha ducha ou cun baño en auga morna, así como recorrer a ventiladores ou aire acondicionado.
Relacionadas:
-
Pontevedra, ás portas do récord histórico de altas temperaturas
Por Alejandro Espiño |
-
Unha vaga de calor "extrema" levará ás Rías Baixas a rozar os 40 graos
Por Redacción |
-
Avanza a vaga de calor nas Rías Baixas con temperaturas que se achegarán aos 35 graos
Por Redacción |
-
As Rías Baixas, en alerta polas altas temperaturas
Por Redacción |