Avanza a vaga de calor nas Rías Baixas con temperaturas que se achegarán aos 35 graos
Por Redacción
As Rías Baixas enfróntanse a xornadas de temperaturas elevadas que, segundo as predicións, prolongaranse ata o 15 de xullo. Durante esta fin de semana os termómetros situaranse preto dos 35 graos, segundo os datos que ofrece o servizo de Meteogalicia.
Este venres 8 de xullo circulará vento do nordés e a provincia de Pontevedra e, en xeral, Galicia atoparase baixo a influencia anticiclónica. Os ceos permanecerán despexados nas Rías Baixas. As temperaturas oscilarán entre os 19 graos de mínima e os 34 de máxima. Espéranse brisas costeiras. A auga do mar ofrecerá no litoral atlántico ofrecerá temperaturas entre os 15 e os 17 graos.
O anticiclón localizado ao oeste de Irlanda manterá a Galicia baixo a súa influencia ao longo do sábado. Os ceos presentaranse despexados ou pouco nubrados con temperaturas que se manterán entre 20 e 33 graos con réxime de brisas. O vento soprará do leste e do nordés.
Non haberá novidades durante o domingo respecto a a presenza do anticiclón situado ao oeste de Irlanda. Entrará, ademais, unha masa de aire cálido desde o sur. Entre Azores e a Península Ibérica comezará a formarse unha depresión en capas altas. Espéranse ceos pouco nubrados, con nubes de tipo alto, e posibles néboas no litoral oeste durante a tarde.
As temperaturas manteranse entre 20 e 30 graos nas Rías Baixas, experimentando un lixeiro descenso nas máximas. O vento será de dirección variable con réxime de brisas tanto nas Rías Baixas como na Costa da Morte.
Ao longo da próxima semana manterase a presenza de aire cálido sobre toda Galicia. Os ceos continuarán despexados en xeral e temperaturas que irán incrementándose progresivamente ao longo da semana con mínimas de 18 e máximas de 32 graos.
Desde o Centro Integrado de Atención ás Emerxencias 112 Galicia recomendan, ante estas temperaturas, que se controle o tempo de exposición ao sol. Piden á poboación que beba auga mesmo sen ter sede, protexer os ollos, cubrir a cabeza e usar protección solar.