A Rúa do Castañal terá plataforma única e estreará pavimento de asfalto puído
Por Alejandro Espiño
Unha das rúas que quedara fóra da reforma integral do barrio do Castañal, que se executou ao longo dos últimos meses, verá renovado o seu aspecto. Trátase da Rúa do Castañal, un vial de uso case exclusivo para os seus residentes.
O goberno municipal ten ultimado o proxecto de reforma desta rúa, que será presentado este xoves aos veciños en asemblea para consultar con eles algúns das cuestións que están pendentes, entre elas o mobiliario urbano ou o seu sentido de circulación.
Na reforma da Rúa do Castañal, o Concello investirá preto de 72.000 euros.
Pasará a ser un vial de plataforma única, polo que as beirarrúas demoleranse para poñer todo o pavimento á altura da calzada. Levará unhas franxas de pedra pegadas aos edificios e o centro será de asfalto puído, segundo explicou o edil de Obras, Demetrio Gómez.
Este material, que non foi empregado ata o de agora en Pontevedra, ten unha efectividade "testada" en moitas outras cidades, sinalou Gómez, e o Concello estuda incorporalo aos materiais habituais das reformas que realiza no ámbito urbano.
A cor que levará este pavimento aínda non está decidido porque "dependerá dos áridos dispoñibles no momento das obras", segundo engadiu o edil do BNG.
A iluminación xa se cambiou a LED hai pouco e a obra non incluirá o cambio dos servizos soterrados, pero si incorporará novo mobiliario. Os veciños deberán decidir se queren unha zona de estancia ou repartir os bancos ao longo de toda a rúa.
Ademais, o Concello propón que esta rúa quede reservada para o tránsito dos seus residentes, mesmo coa posibilidade de cortala ao tráfico polo medio, pero esta cuestión tamén se deixará a elección dos veciños que acudan á asemblea que se convocou.