O profesorado dos centros públicos protesta contra as instruccións da Xunta para o vindeiro curso
Por Oskar Viéitez
O profesorado de moitos centros de ensino público de Galicia realizou este mércores concentracións para expresar o seu rexeitamento ás últimas actuacións da Consellería de Educación.
A mobilización foi convocada polo sindicato CIG-Ensino para que o profesorado proteste contra "unhas imposicións feitas contra o noso criterio, sen tomar en conta a nosa profesionalidade e afondando aínda máis nunha sobrecarga de traballo e burocracia e nunha falta de respecto por un colectivo, o docente, que debería ser tomado en consideración como o que é, a parte central do sistema educativo".
Entre outros asuntos, o profesorado rexeita o incremento do calendario escolar por riba dos 175 días que a Lei estatal impón, e tamén o incremento da burocracia. Tamén contra a negativa da Consellaría a negociar uns horarios lectivos "xustos e que nos permitan recuperar os nosos dereitos" (18 e 21 horas lectivas en infantil e primaria e secundaria respectivamente).
Ademáis piden a mellora das condicións nas que desempeñan o seu traballo, reducindo ratios e mellorando a atención á diversidade e o incremento dos cadros docentes.
O profesorado tamén expresou o seu desacordo coas "imposicións das Instrucións do próximo curso escolar, promovendo medidas irrespectuosas co conxunto de integrantes dos claustros", como a elección de grupos en secundaria no mes de xullo sen a presenza de todo o profesorado afectado, e tamén "contra a desconsideración das mestras e mestres de Infantil, restrinxindo o período de adaptación, até anulalo na práctica, sen ter en conta a decisión profesional".