A falta de microchips atrasa o cambio a LED da iluminación en cinco parroquias
Por Alejandro Espiño
Os problemas na subministración de produtos electrónicos e, especialmente, nos microchips obrigaron a ampliar o prazo previsto para terminar as obras de eficiencia enerxética na iluminación de cinco parroquias de Pontevedra.
Estes traballos, que executa a empresa Setga, víronse afectados sobre todo o atasco no tráfico marítimo que se rexistra no porto chinés de Shanghái, que impide que a distribución destes produtos acumule demoras considerables.
Por iso, o cambio de toda a iluminación exterior das parroquias de Marcón e Mourente atrasarase dous meses máis do previsto e, en lugar de estar terminada en xuño, o novo prazo de finalización das obras queda fixado no 2 de agosto.
No caso de Verducido, Santa María de Xeve e Santo André de Xeve, pola súa banda, tamén se amplía o prazo en dous meses máis, polo que a nova iluminación terá que estar lista antes do 24 de xullo, en lugar de finais de maio como estaba previsto.
RESCISIÓN DAS OBRAS DE ACEVI
A Xunta de Goberno municipal aprobou tamén iniciar os trámites para a rescisión das dúas obras adxudicadas á empresa pontevedresa ACEVI, que renunciou a estes contratos tras entrar en concurso voluntario de acredores.
A ampliación do cemiterio de San Amaro aínda non empezara polo que o Concello devolverá os 12.000 euros entregados como garantía e poderá licitar de novo as obras, mentres que no caso da reforma do Teatro Principal a tramitación é máis complexa.
O nivel de execución desta obra alcanzaba o 15%, uns 28.000 euros, polo que a resolución do contrato debe ter en conta esta situación e, á hora da nova adxudicación, haberá que refacer o proxecto construtivo.
Mentres iso non se resolve, o Concello destinará uns 15.000 euros para contratar unhas obras de emerxencia que doten ao Principal de aseos públicos, de forma que poida retomarse a súa actividade cultural ata que se adxudique a nova obra.
No Centro Sur, por último, tamén se realizarán obras de emerxencia, valoradas nuns 83.500 euros, para substituír as xanelas das dúas plantas que ocupará a residencia de Amencer, que provocaban filtracións de auga que afectaban á súa rehabilitación integral.
Relacionadas:
-
A nova iluminación led de Cerponzóns, Campañó e Alba permitirá aforrar 187.000 euros ao ano
Por Redacción |
-
A crise de Acevi obriga a reformular tres obras en Pontevedra, entre elas a do Teatro Principal
Por Alejandro Espiño |
-
O rural de Pontevedra presume da "iluminación máis moderna do mundo"
Por Redacción |
-
SETGA renovará a LED toda a iluminación pública de Alba, Cerponzóns e Campañó
Por Alejandro Espiño |