Cuntis ampliará a súa dinamización cultural cunha achega do Plan Concellos
Por Redacción
A Deputación de Pontevedra achegará, a través do Plan Concellos, un total de 13.000 euros a Cuntis co fin de dinamizar a cultura no rural.
Esta partida permitirá ampliar a programación cultural prevista nas parroquias que, como é habitual, se intensificarán nos meses de verán.
Manuel Campos, alcalde de Cuntis, valorou esta achega debido á "importancia que ten para o goberno local descentralizar a oferta cultural municipal, de xeito que cada parroquia conte con actividades propias ás que nenos e maiores poidan acudir sen necesidade de desprazamentos".
Insistiu, ademais, en que "unha programación cultural propia contribúe a fixar poboación no rural, a darlle aos veciños e veciñas das parroquias as mesmas opcións que aos que residen no casco urbano" e apuntou o "complicado" que é para o goberno local "avanzar na descentralización con recursos propios" de aí que valore de xeito especial esta contribución da Deputación.
"A distribución dos recursos provinciais a través do Plan Concellos está constatado que favorece a municipios como Cuntis, pero a maiores teño que destacar as vantaxes que supón para nós que a Deputación habilitara este tipo de partidas para a dinamización cultural do rural", concluíu.
Relacionadas:
-
Maxín Xulio Picallo Durán presenta en Cuntis o seu libro 'De Roncesvalles a Santiago de Compostela: un escultor en el Camino'
Por Redacción |
-
Castrolandín será unha das sedes do Festival de Narración Oral Atlántica
Por Redacción |
-
"O ladrón de paraugas" de Xosé Lueiro e ilustrado por Sara Valcárcel preséntase na Biblioteca de Cuntis
Por Redacción |