Juan Andrés Pérez, novo capitán marítimo de Vilagarcía
Por Oskar Viéitez
Juan Andrés Pérez é o novo responsable da Capitanía Marítima de Vilagarcía de Arousa, cargo no que vén de tomar posesión recentemente.
Este luns tivo lugar o primeiro encontro institucional da subdelegada do Goberno en Pontevedra, Maica Larriba, coa capitanía desta dependencia do Ministerio de Transportes na localidade. Á cita acudiron o concelleiro de Seguridade Cidadá, José María González, e a concelleira de Promoción económica, Alba Briones.
Antes de acceder ao presente cargo, Juan Andrés Pérez xa estivera destinado na Capitanía de Vilagarcía como inspector de seguridade marítima e, actualmente, traballaba en Vigo como coordinador de seguridade e inspección.
O novo capitán é enxeñeiro naval de profesión e ata a súa incorporación ao Ministerio de Transportes en 2008 desenvolveu o seu traballo en diversos estaleiros e oficinas técnicas e navais de todo o país.
Maica Larriba salientou o seu gran coñecemento do sector e, ademais de desexarlle "todos os éxitos" e destacou a "importancia e responsabilidade de estar á fronte desta Capitanía Marítima, encargada da ordenación da navegación e seguridade marítima nun espazo clave da provincia e moi amplo, pois abarca desde o río Sieira en Porto do Son ata Punta Faxilda en Noalla".
Mostra do inxente traballo que desenvolve a Capitanía de Vilagarcía son as cifras do pasado ano, onde se tramitaron 10.500 enroles e desenroles de mariñeiros, despacháronse 6.350 buques, inspeccionáronse unhas 1.200 embarcacións e certificáronse 1.800 barcos.
Os seus 26 funcionarios atenden unha flota que supera as 3.500 embarcacións, ademais de coordinar a seguridade marítima e e traballar na prevención da contaminación.