Paga máis de 17.000 euros a un bruxo para atopar parella e acaba sen diñeiro e sen moza
Por Redacción
A Policía Nacional detivo en Pontevedra a un home de nacionalidade senegalesa como presunto autor dun delito de estafa por supostamente ofrecerse como bruxo para mediar en asuntos sentimentais e estafar máis de 17.000 euros a un pontevedrés. A presunta vítima pagoulle o diñeiro para conseguir parella e quedouse estafado e sen moza.
Segundo a Policía Nacional, os feitos remóntanse ao 6 de novembro. Un home denunciou na Oficina de Denuncias e Atención ao Cidadán da Comisaría de Pontevedra que atopou un folleto publicitario no seu vehículo sobre os servizos dun bruxo e chamoulle para que lle axudase a conseguir unha relación sentimental cunha amiga, pero resultou supostamente estafado.
O denunciante desprazouse ao domicilio do presunto bruxo e tras expoñerlle o seu problema este propúxolle un ritual, polo que lle cobrou 410 euros, co que lle aseguraba conseguir á moza. Logo díxolle que para obter resultados debería levarlle máis diñeiro, de modo que días máis tarde volveu ao domicilio e entregoulle un sobre con 16.000 euros no seu interior.
Entregado o diñeiro, o bruxo efectuou un presunto ritual co sobre, entregoulle un líquido e díxolle que fose ao baño e o botase pola cabeza. Ao saír, o presunto bruxo entregoulle un sobre máis grande no que supuestamente metería o sobre inicial cos 16.000 euros e cominoulle a que non o abrise ata pasado un mes, baixo pena de sanción de 300 euros.
Ao chegar a casa, o denunciante en contra das indicacións impartidas polo bruxo, abriu o sobre e decatouse que no seu interior só había libretas de notas en branco en lugar do diñeiro, polo que o chamou por teléfono ao que o bruxo contestou que agora debería darlle 300 euros de sanción, que tamén lle entregou.
A raíz da denuncia, os axentes iniciaron as xestións pertinentes para tratar de pescudar todos os datos posibles achega deste suxeito. Tras diversas xestións, os axentes averiguaron a identidade da persoa que se publicita como bruxo.
Trátase dun home de 36 anos con antecedentes policiais e localizárono sobre as 10.30 horas do 13 de novembro e detivérono por un delito de estafa. Tras prestar declaración, foi posto a disposición xudicial.