A proposta de zonificación escolar da Consellería xera un amplo rexeitamento en Marín
Por Oskar Viéitez
O pasado xoves tivo lugar unha reunión ordinaria do Consello escolar municipal, un órgano de consulta e participación está presidido pola alcaldesa María Ramallo e conformado por outros 10 membros da Corporación en función da súa representación na mesma, entre os que está a responsable da área de educación, 10 vogais en representación do profesorado, 6 das asociacións de pais, 4 do alumnado, e o representante da Consellería de educación. En total 31 persoas, das que asistiron 28 á devandita convocatoria.
Na orde do día se levaba a proposta da Xefatura territorial de educación para a delimitación das áreas de influencia e adscricións entre centros educativos do Concello de Marín.
O grupo municipal do BNG rexeita a proposta de zonificación da Consellería de Educación que, segundo sinalan "debería velar pola calidade e bo funcionamento dos centros de ensino público e non continuar recortando unidades".
"Perante a crise demográfica, a Consellaría de Educación debería dar prioridade absoluta á conservación de unidades nos centros públicos e reducir a oferta de prazas dos centros privados concertados", afirma a portavoz municipal do BNG, Lucía Santos.
Para Manuel Pazos, portavoz do PSOE en Marín "o proxecto exposto pola Xunta, e no que vemos claramente a man do goberno local, rompe definitivamente a convivencia histórica entre a educación pública e a concertada en Marín e doutra banda favorece claramente ao colexio da Laxe en detrimento de os demais centros públicos".
A proposta tamén foi rexeitada de xeito unánime polas ANPAS, representantes sindicais xa que cos cambios propostos estarían creando "graves problemas" que afectarían "negativamente" aos centros públicos do concello..