Cambian o nome da asociación de Avogados Novos de Pontevedra por cuestión de Igualdade
Por Oskar Viéitez
A asociación de Avogados Novos de Pontevedra cambiará a súa denominación pola de Avogacía Nova de Pontevedra, unha decisión que adopta a nova Xunta Directiva que agora preside Jésica Ventin.
Este nome resulta "máis inclusivo" tal e como sinalou esta nova Directiva que está formada maioritariamente por mulleres; Jésica Ventin (Presidenta), Silvia Neira (Vicepresidenta), Miryan Salgado (Secretaria), Luís Pintos (Tesoureiro).
Entre os seus obxectivos, atópase o achegar a profesión aos novos colexiados, abrigo nos primeiros momentos que son os máis difíciles, acompañándoos no acceso á colexiación e á profesión. Ademais de "dar visibilidade á agrupación reordenando aos agrupados e convidando aos que aínda non a coñecen".
Tamén queren ofrecer apoio e acompañamento para que os novos colexiados poidan acudir aos avogados da asociación con máis experiencia, en caso de dúbidas con algún asunto e mesmo acompañamento a Xulgados, asistencia a detidos, etc, para que coñezan o funcionamento dos mesmos.
Outro obxectivo que teñen é "dignificar a quenda de oficio".
Outra singularidade deste novo equipo que asume a Avogacía Nova de Pontevedra é que está formada por compoñentes de distintos partidos xudiciais, descentralizando así que o único lugar ao que poidan acudir os novos colexiados sexa Pontevedra, podendo coñecer os problemas dos avogados novos en cada partido xudicial, distribuíndose da seguinte maneira: Jésica Ventin, con despacho en Pontevedra; Silvia Neira, con despacho na Estrada; Miryan Salgado, con despacho en Cangas de Morrazo e Luís Pintos, con despacho en Caldas de Reis.